السلام عليكم ورحمة الله وبركاته
اولا اعرفكم بنفسى
انا آلاء طالبه فى كليه اداب قسم اعلام جامعه المنصورة الفرقة الرابعه
دخلت القسم ده عشان كان ليا احلام كبيرة انى اتعلم ازاى ابقى اعلاميه ومحاورة جيدة
واتعلم اصول الكتابه صح عشان انا بحب اكتب بس عايزة حد يوجهنى صح
مش هاضحك عليكم واقولكم انى متعلمتش حاجة هو انا اتعلمت خلال السبع ترمات
بس للاسف كنت متخيله حجات واتصدمت بحاجة تانيه خالص اتصدمت انى بقالى
سبع ترمات بحفظ بس عشان اروح اكتب الى حفظتة فى الامتحان ولا لاقيت التدريب
الى كنت بحلم بيه ولااى حاجةخالص فقررت انا اعلم نفسى واستفاد من تجارب الى حواليا
واقترح عليا استاذى الفاضل من وانا صغيرة الى بجد بعزة وبحترمة اووووووى أ/باسم الشربينى
انى ادخل الاول عالم التتدوين كخطوة انايمكن بحب اكتب لكن فى منتديات لكن احساس حلو انك يبقى
ليك مدونة خاصة تحلم فيها وتطلع كل احاسيك جواها .
اتكلم بقى عن جزء من احلامى :
طبعا فى البدايه ان ربنا يحبنى ولما هيحبنى هيرضى عنى وهايحبب فيا كل الناس بحلم انى اقابل الرسول وابقى معاه فى
الفردوس الاعلى من الجنة حلمى بجد انى اعمل حاجة للاسلام اغير فى الدنيا بزعل اووى لما الاقى الرسول تعب
اوووى عشانة واحنا متعبناش عشانةبل بالعكس خلينا يتعرض للاساءة والاهانة عايزة افضل لغاية اخر لحظة فى عمرى
اخدم دينى واغير فى نفسى وفى الى حواليا بحلم انى عالطول ابقى ااقوى من شيطانى وميعرفش ابدا يضحك عليا.
انى ابقى سعيدة واسرتى كمان تبقى سعيدة وانى اكون بيت مسلم سعيد واعرف اربى ولادى تربية زى الى انا اتربتها
بس طبعا يكونوا احسن منى.بحلم انى اعمل عمرة واحج انا واصحابى واهلى وكلنا مع بعض بحلم انى ابقى صحفية
واعلامية ناجحة واكتب كلمة حق وارفع الظلم عن كل مظلوم.
والى دفعنى اكتر انى اكتب مدونتى ان من وانا صغيرة بحلم انى اخدم دينى ولو بكلمة
واغير من المجتمع الى عايشاه فيه ومن المفاهيم الغلط الى حوالينا وغير كدة وكدة انى اخرج كل الى جوايا
واسمع النقد الى يفدنى عشان ابقى شخصيه ناجحة.
اما عن احلامى لبلدى:
بقى بحلملها بحجاااااات كتيرة اووووووى اولا بحلم ان كلمة ديكتاتورية مايبقاش ليها وجود ويحل مكانها ديمواقراطية
خالصة.بحلم ان بلادنا تبطل بقى تفصل بين الدين والسياسة لان دينا هو سياستنا وطول ماحنا ماشين فى طريق ربنا
بلادنا هتتطور وهاتبقى احلى عارفين لية؟عشان احنا كمسلمين عندنا كنز والكنز ده هو قرانا الى لو تتدبرنا اياته
هنلاقية مش بس منهج دينى لا وسياسى واقتصادى وثقافى كمان فلا لفصل الدين عن الدولة.بحلم ان د/مصطفى السيد
واحمد زويل بدل ماامريكا وبوش هو الى كرموهم كان رئيسنا الى يكرمهم ويشجعهم وبلادنا تفتح للعلماء دراعتها زى
ماهى فاتحة للفاننين والفنانات وكل الى عايز يتشهر يجى مصر ويغنى ويمثل ويرقص لكن بقى لما حد يخترع حاجة
جديدة يعمل حاجة مفيدة لا يبقى هو جه العنوان الغلط يلف لفة كدة ويروح لبلد تانية تقدره.بحلم ان كلمة سلبية وانا
مالى تتلغى من قاموس مصر ويبقى شعبها وولدها رجاله بجد ويبقوا اجابين وميمشوش جنب الحيط ويغيروا فى بلدهم
وتكبر بيهم.نفسى الملايين الى فى انحاء العالم الى سابوا بلدهم وبيدوا خيرهم لبلاد الغرب وانا مش بلوم عليهم لان
مصر الى عملت كدة فيهم لانها كرهت ولادها فولادها دوروا على الى يقدرهم بحلم بقى انهم يرجعوا مصر لكن مرفعين
الراس ومعترف بيهم ويلاقوا شغل محترم ومصر تحترمهم عشان يحترموها.نفسى اغمض عينى وافتحها يقولولى
حكومة نظيف اتشالت وحطوا مكانها حكومة منتقاه والشعب الى مختارها وبنزاها تامة ومن غير تزوير .....مش بلقح
على انتخابات مجلس الشعب2005ولا بلقح يعنى لاسامح الله على التعديلات الدستورية الى عدت كدة منها لنفسها ولا
مثلا لانتخابات الكبير بتاعنا ريسنا لالالالالا اوعوا تفهمونى صح!!!!!!!!بحلم ان مصر هى الى تفوق الدول العربيه
وتعرفهم انى فى ولادهم فى غزة والعراق وفلسطين وفى كل يوم بيموتوا واحنا السبب بحلم انحنا نبقى ايد واحدة ويبقى
فيه سلام لكن نقدر نقول لامريكا واسرائيل لا كفاية لحد هنا وستوب .نفسى شبابنا يبقوا اخواتنا بجد يحافظوا علينا فى
الشارع ميعكسوش ولا يتحرشوا ولا يجرحوا فى اخواتهم بل هما الى يدافعوا عننا ويحافظوا علينا.بحلم انى اغمض
عينى وافتحها الاقى بلدى واخدة افضل دوولة تتطبق الاسلام وبناتها اجدع بنات بحجابهم والتزامهم وشبابها احسن
شباب بايجابيته واحترامه لذاتة قبل مايحترمنابجد احلامى لبلدى ملهاش حد وبجد كل ده عشان بحبها اه وربنا بحبها
اووووى ونفسى تبقى احلى بلد فى الدنيا وبجد متمناش ابعد عنها ابدا بس هى عالطول مزعلانا بس والله يامصر بحبك
ويارب يارب تتطورى وتكبرى بينا
احلامى كتيرةومبعثرة نفسى ارتبها وكلها تتحقق
واسيبكم بقى دلوقتى وارجع تانى باول توبيك تدوين ان شاء الله
اسالكم الدعاء.
