(وداعا لاجمل فترات حياتى)
البوست النهاردة مختلف لانى مش جايه اقووووول كلام منسق
انا جايه اتكلم عن احاسيس كتيرة جوايا حساها الايامدى بالتحديد
لان الايامدى مش زى اى ايام انا يمكن بمر بفترة صعبه اوى
ومحستش بكدة بجد غير النهاردة وانا باخد أخر محاضرة فى المرحله الجامعيه كلها
يااااااه ا ايه الايام عدت بسرعه انا فاكرة لسه وانا فى سنة اولى كانة امبارح وانا داخله عالم الجامعه
باحساس فيه رهبه وفرحة فى نفس الوقت
رهبه من عالم غريب سمعت عنه وكنت لسة اول مرة اعيشة وفرحة
انى خلاص بقيت طالبه جامعيه وخلاص بقى هابقى حرة نفسى ولادروس ولاشدة
اعصاب ولاحجات من تى خالص وكمان دخلت المجال الى كنت حاباه
حاسة ان كل حاجة دلوقتى بتعدى قصاد عنيا لسة فاكرة حفله الترحيب الى اتعملت لينا
والى اتعرفت فيها على بنات عمرى ابدا ماهنساهم
وفاكرة كمان اول محاضرة دخلتها لـ د/منى طه فى مادة نشئة وسائل الاعلام
واد ايه انا كنت مستغربه الجو وموش فاهمة حاجة ولا اول مرة بقى اطلب منى بحث كنت ملبوخة على الاخر
وروحت لمدرس الاقتصاد بتاعى بتاع ثانوي عشانن يساعدنى لانه كان بحث فى مادة الاقتصاد الاعلامى
وادانى كتاب عن طريقه عمل البحوث وكنت مكبرة الموضوع اوى
ومن هنا كمان كانت بدايه دخولى للنت عشان ابحث عن معلومات
حتى كان اول بحث عملته كان عن(عماله الاطفال) ياما بعدها عملت بحوث ولافاكرة حتى اسمها
,لكن بجد اول حاجة فى حياة الواحد دى بيبقى ليها ذكريات تانيه
بجد حاسة انها كانت لسة امبارح ,
ولاايام الرحلات الى بجد كنت بضحك فيها من قلبى
بجد عشت فى كليتى ايام تحفة لغايه الان انا موش مصدقة انى سايبه كل ده خلاص
بودع اجمل فترات حياتى بودع اصحاب ياعالم هنشوف بعض تانى
انا فعلا محستش بمرارة ده غير دلوقتى كنت النهاردة بودع خلاص المحاضرات
والمدرجات والقرصات الى كنت بخدها
وايام المزاكرة الى معدش لسالى فيها غير شهر بمافيها بقى من خنقه وتوتر بس
والله كانت بتبقى متعه خاصة انا واصحابى مش بنزاكر غير بالرنات على الموبيل
واخواتى يقولولى انتى صداع انتى واصحابك مش بتبطلوا رن بس بجد انا اصحابى منى وزهرة
دول من الناس الى كسبتهم اوى فى فترة الكليه ومش بنعرف نزاكر غير لمانرن لبعض بالورقه
وبعد نهايه الفصل نتكلم والله بتبقى متعه وتشجيع فى نفس الوقت اننا منقومش من على الكتاب ده غير الايام الجميله
الى عشتها معاهم واكلنا برة الى مرة يبقى حلو ومرة يبقى مؤرف
وبطننا توجعنا كلها ايام حاسة انها مش هاتتعوض..........وفى فترة كمان من حياتى كانت مهمه اوى
وهى اشتراكى فى جمعيه رساله الى عرفناها عن طريق الجامعه بردوة وطبعا هى قريبه من اداب
فكنا نخلص محاضرتنا ونروح او نكنسلها بمزاجنا ونروح وفعلا رساله دخلتنى فى عالم كنت بعيدة عنه اوى
من زيارات للايتام ودار المسنين ليوم اليتيم وازاى كانت حفله تحفة
والاطفال كانوا مبسوطين للجنه المكفوفين الى انا عالطول
فيها بنساعد اصحابنا المكفوفين باننا نكتبلهم على الكومبيوتر المناهج عشان تتطبع برايل
او نمليهم وهما يكتبوا وعرفت اد ايه انا فى نعمه
موش حاسة بيهت كنت كل لحظة بشكر ربنا على كل النعم
والله اتعلمت منهم يعنى ايه كلمة رضا شوفتها فيهم وفى صبرهم وتعايشهم مع
الى هما فيه وان شاء الله مستمرة معاهم بس هافتقد الاوقات الكتيرة الى قضتها معاهم
يمكن فيهم ناس خلاص هيخلصوا ومش هاشوفهم تانى ..........
يمكن فى حجات انا مستمتعتش بيها اوى وندمت عليها فى كليتى الشعبه الى انا فيها(اذاعه وتلفزيون)
انا كان نفسى اصلا ادخل صحافة بس سبحان الله الدكتور دخل عقدنا فيها وخلانا كتبتنا اذاعه
وقالنا ان قسم اذاعه بياخد من اعلى الدرجات وتقديره عالى وهو فعلا كدة بس انا مفروض مكنتش اتاثر بالكلام ده
واخلينى على الى انا حاباه بس هو ده كان قدرى انا دخلت اعلام وانا بارادتى
وجه موضوع الشعبه فى سنه تالته ده هو الى اجبرت بس بطريق غير مباشر بس يمكن هو ده الخير ليا
وكمان عرفت حجات مكنتش اعرفها فى عالم الانتاج والاخراج
فبرجع تانى واقول الحمد لله رغم انه صعب وابحاثنا وشغلنا كتير بس خلاص اتعودت واتاقلمت فيه
وادينى خلاص بودعه وانا قلبى بيتقطع انا فعلا بغبط بتوع سنه اولى جدا
ونفسى ميضيعوش ولو يوم واحد يعملوا فيه حاجة مفيدة ويسيمتعوا باجمل ايام هيعيشوها .........
ياااه ياكليتى كنت داخلاكى وانا عماله ابصلك ومدايقة انك برة الجامعه واقول ليه احنا مش فى الحرم الجامعى
وكمان شكلك زى المدرسه ودلوقتى بجد بقيتى من اقرب الاماكن لقلبى وبودعك بدموعى
ونفسى لو الايام ترجع واستمتع بكل دقيقة فيكى ..........بجد بحبك اوى يا اداب المنصورة
بحبك ياقسمى اعلام بحبكم يااحلى اصحاب فى الدنيا واصدقاء الدرب لمدة4 سنين
وهتوحشونى اوى وان شـــــــــــاء الله علاقتنا تستمر لان حبنا فى الله
لكن انا بس بودع ايام عشتها معاكم بودع وزارة التربيه والتعليم وبقولها
مع كل مابكى من عيوب بس عمر ماهنســــــــــاكى وكنتى اجمل فترة عشتها
والقاكى فى فترة جديدة اخرى من تعليمى الى يارب ارزقنى العزيمة واعمله
وهوو الدراسات العليا والماستر ان شاء الله بس كدة خلاص خلص التعليم الاجبارى
ياترى حياتى من غير جامعه هاتبقى عامله ازاى؟ ربنا يعينى واقدر استغلها صح وانمى نفسى وقدراتى
دعواتكمــــــــــ
ووداعـــــــــــا آداب المنصورة بكل مابكى من ذكريات
