طبعا البوست باين من عنوانه انا فعلا النهاردة خدت الاجازة
وبجد مبسوووووووطة جدا عشان الترم ده كان ضاغط عليا جامد
والحمد لله عدت على خير وعقبال النتيجة بقى
عشان ابقى خريجة رسمى وباثبات الاوراق
طبعا النهاردة مع فرحتى دى كلها انى خلاص خلصت
ومعدش فيه مزاكرة ومعدش فيه استريس امتحانات
وهناااااااااااااااام براحتى واصحى براحتى وموش هاعد احلم بالمواد
واصحى من عز نومى عشان اشوف جزئية نسياها
واالاقى الورق الى جبته فى المادة موش حلو واعد الخصه تانى
والساعه الى كانت عمالالى توتر انى موش هالحق اخلص
ياااااااااااااااااااااااه هارتاح من كل ده يعنى فرى فرى على الاخر
بس حقيقى كان يوم صعب وانا بودع كليتى وبصورة رسميه وبودع اصحابى
وبودع كل التعليم , هو ان شاء الله هاشوف اصحابى عالطول
بس حقيقى هتوحشنى ايام الدراسة اوى
على راى اخويا متصل من السعوديه
عشان يغظنى ويقولى مبروك الاجازة وانتى خلاص مابقتيش طالبه وصغيرة
بقيتى بقى انسة جامعيه متخرجة ولافيه راحة الكليه
ولا عملت فى الكليه كلها هاتبقى كنت بعمل كذا فى الكليه
فعلا كل حياتى الجامعيه بقت فعل ماضى
, وودعت الكليه بدموعى بجد مكنش هاين عليا امشى
واتفقت انا واصحابى اننا ان شاء الله ننزلها
ونخلى فسحتنا وتجمعنا فيها لانها شهدت احلى ايام حياتى
هو انا موش عايزة انكد على نفسى من دلوقتى واحس بمتعه الاجازة
وطبعا انا موش عايزة اكرر كلام بوست وداعا آداب المنصورة
بس انا قلت اكتب الكلام ده
بس عشان يبقى مجرد ذكرى ابقى افتكر فيها يوم تخرجى 25/6/2009
الساعه 2:50 مساءابالظبط كنت خارجة من اللجنة وانا مبسوطة وموجوعه فى نفس الوقت
املى بقى ان يارب النتيجة تبقى كويسة وابقى فعلا اتخرجت فى اليوم ده
ولسة بقى قدامى افكار كتيرة وحياة عمليه
وريفرش كدة لنفسى فى عباداتى وحفظى للقران وصله رحمى
وكمان اهتمامى بمدونتى وقرصات بقى والتنمية من نفسى
ويارب تبقى اجازة سعيدة
ويارب يجيب اخواتى بقى بالسلامة
عشان الاجازة تبقى احلى حقيقى وحشونى اوووووووووى
وانتظرونى فى بوستى القادم وفى كل كتاباتى ودعواتكم ليا بالتوفيق
وخلينى بقى متفائلة واقول ويلكم بيكى يااحــــــــــــــــــلى اجازة
