(صرخة الم)
خرجت الصرخة دى من على شاطىء مصيف جمصة ,صرخة قلبت كيانا جميعا طبعا محدش فاهم حاجة هاحكى وابدأ الحكاية من الاوللان لازم احكى يمكن لما احكى أرتاح معلش لو هاطول عليكم بس فى نقاط كتيرة خنقانى اوى
, بدأت القصة من اننا فى البيت كنا زهقانين
وقررنا نروح نتعشى برة فقولنا نروح بحر ونعد شويه فكان اقرب مكان هو جمصة صلينا العشا وروحنا , واليوم كان عادى وكنا بنهزر
ونضحك لغاية لحظة ماجه اخويا الكبير د/سامر اتكعبل على الشط وقع على رجله ومن هنا كانت الصرخة جرينا كلنا نشووووف فى ايه
وكل الى جه فى بالنا انه مجرد شد عضلى والشط كله اتلم واخويا يعينى مش قادر يقاوم الالم وبيصرخ جامد
, الحل الطبيعى اننا نستدعى
اسعاف الشط عشان هى الى تتصرف وتشيله عشان ميتشلش فى وضع غلط , فأمن الشط وصل
, طلبنا منه الاسعاف رد بكل بساطة وقال الاسعاف قافله احنا الساعة 2بالليل على اعتبار ان الاسعاف دى سوبر ماركت مثلا,, لأ
وغير كدة وكدة بيقولونا ممنوع التجمهر ويلا
نشيله ونفض الدور عشان لو الداخليه جت احنا هنتأذى على ان الداخليه واقفه مستنيه سعادتهم ، مش راحمين اخويا الى مرمى على الشط
وبيصرخ مش راحمين قلقنا وخوفنا مراعوش اى حاجة وبيتعاملوا بمنتهى القسوة , والله ساعه وربع واحنا فى الحورات دى , لغايه
مازوجته جابتله حقنة مسكن لانها دكتورة وفاهمة لغايه مانتصرف وكمان مكنوش راضين وبيقولها افهم دى حقنة ايه على اعتبار ساعته
معاه الدكتوراة مثلا , نقولهم طيب ندخل العربيه الشط ونشيله فيها يقولوا لأ الشط مقفول مش هاينفع المهم لغاية ماالحمد لله والدى جاب
اسعاف من مستشفى خارجى ونقلنا اخويا بعد معاناه , راح مستشفى جمصة الجديدة وحطوا 3 اربع خطوط كدة على الجديدة دى , طبعا
مفيش اى دكاترة غير هو دكتور واحد ,فنى الاشعه بصلوا كدة وقالوا رجلك اتكسرت روح دمياط وهما كدة كدة هايعملولك اشعه مش لازم
اعملك ....(اترك لكم التعليق) المهم عمل الاشعة والحمد لله مكنش فيه فى المستشفى ملايه حتى يتغطى بيها وجابولو ستارة متوسخة يتغطا
بيها وعمار يامصر
وطلعت نتيجة الاشعه كسر فى عضمة الفخد والعضمة متحركة من مكانها لغايه اللحم , يعنى محتاج يركب مسمار ويعمل العملية
والحمد لله انها جت على اد كدة , وهو اخويا الحمد لله حامد ربنا زعله مش على الى حصله زعله على الى حصل فيه والتعامل بتاع
البشر ,قلنا يروح
مستشفى الجامعه فى المنصورة بس بتبقى قافلة مفيش غير الدولى والعام
والمستشفيات الخاصة كمان هاتبقى قافله احنا كنا 4الفجر بس
امكانيتهم مش كويسة فقرروا يروحوا مستشفى الازهر فى دمياط الجديدة
, لانها مستشفى متأسسة جديد وكمان اخويا اشتغل فيها سنتين
يعنى الناس هناك عارفينه وبعد معاناة مع عربية الاسعاف الى كانت زى الكشك بالظبط مفيهاش اى امكانيات ومع صراع من الالم
والمطبات من جمصة لغايه دمياطـ وكل مطب بألم رهيب له , وصل والحمد لله ودخلنا بيه وبدأت سلسله تانيه من الاساءة والاهمال
الدكتور
الى استقبلنا بصلنا كدة وقال مفيش سراير فاضيه ,بجد كانت صدمة زوجة اخويا قالتله حطة فى اى قسم مش شرط العظام وانا
هاتصرف ,
وعرفنا بعد كدة ان فيه قسم كامل مفتوح جديد ومفيهوش اى حد وجميع سرايره فاضيه لكن هاقول ايه على ضمير الناس
,المهم طلعناه فى القسم الفاضى واصحابه حطوه فى غرفة الطبيب , ودى كانت حاجة كويسه , نيجى بقى للدكتور مفروض يعمله حاجة
اسمها (التومس) انه يشد رجله باسياخ حديد عشان يثبتها على مايعمل العملية , طلب انه ياخد مسكن رد ببردود مفيش مسكن
استحمل انت وشد رجله بطريقة غلط لان مفروض رباط الضغط يبقى من تحت عمله من على مشط رجله من فوق على الرغم ان اخويا
قاله لكن بردوة مشا الى فى دماغه وعور رجله وبهدلها فضل اخويا كدة 3ايام لغايه مالدكتور الكبير يجى من القاهرة ويعملها
معلش اسمحولى احكيلكم المأساه الى حصلت فى العمليه مفروض ان بيكون فى صنيه فيها المسامير مجهزة وقت العمليه جه دكتور التخدير
خدره بنج نصفى لو ان اخويا كان رافض لانه بكدة هايبقى سامع كل حاجة وبعد لما خدره اكتشفوا ان صنيه المسامير ناقصة مسمارين
الدكتور اعد يزعأ فى الدكاترة وفى الحكيمات وكل ده واخويا سامع على الرغم اننا دافعين حساب كل ده وكمان ممضينا على اقرار اننا
متبرعين بيهم للمستشفى يعنى مصرفوش علينا حاجة المشكله ان المسامير لما تيجى تتعقم ساعتين ووهو خلاص اتخدر فضل متخدر
ساعه وتلت وهما عاملين يزعأوا ونفسية اخويا تحت الصفر وعدا من وقت التخدير ساعة وتلت جه فى نص العمليه وهما بينشروا فى
العضم وبيدقوا بالشاكوش حس بالالم وفاق خالص اعد يصرخ فيهم وقالوهم محدش عاد يعمل فيا اى حاجة الا لما تجيبولى دكتور
التخدير وخدرونى من تانى دكتور التخدير قال باستهتار يعنى ايه يعنى فايق حرك رجلك كدة فقاله اهو وحركها طبعا عرف انه فاق وكان
عايز يخدره نصفى تانى قال لأة انا رجلى مرفوعه والتخدير هيرجع تانى وخدروه كلى فى الاخر طيب لازمته ايه كل ده يعنى لكن بجد
كلنا بنقول الحمد لله انابحكى من زعلى على حال بلدنا, المؤمن مبتلى وكلنا الحمد لله مؤمنين بده بس الى يدايق الاوضاع الى
حوالينا ومعامله المريض نفسة ده كانت الممرضة يبقى معاد الدوا 12الضهر تيجى الساعه 2 وباليل يبقى 12 تيجى عشرة ونص
عشان تنام بدرى......فبجد وضع يحزن احكى عن ايه ولاايه احكى عن التكيف الى كان بيقطع فى الغرفة بمدة تسع سعات ليلا
وزوجته تلف المستشفى كلها يقولولها اصلا مفيش فنى تكيف نباطشى مبيجيش غير الصبح ولما قابلته قالها
انا مليش ذنب شركة الكهربا هى الى بتخفض الكهربا عن المستشفى فالتكيف بيفصل اوتوماتيك
ولا احكى عن كنت مرة بزوره فى المستشفى وهو يعينى بيصرخ من الالم وبيطلب من الدكتور حقنة مسكنة
قاله خد بندول على اساس انه عنده شويه صداع ولا نزله برد ولااحكى عن الدكتور الى كان بيغيرله الجرح وبيرمى الشاش الملوث على الارض ولما اخويا شافه جاله هبوط حاد فى الدورة الدمويه من الاشمئزاز واغمى عليه ومحدش لحقة غير زوجته بالمحاليل والحقن وفاق بعدها بنص ساعه ........احكى عن ايه ولا ايه....
انا مش جايه اتكلم عن حاله اخويا بس يمكن دى مجرد حاله من الاف الحالات الى ماليه المستشفيات ويمكن حاله اخويا اهونهم وكمان
دكتور يعنى كانت معامله خاصة شويه مابلكم بلى ملهومش اى سلطة والناس الفقيرة والمواطن المطحون
وفى الاخر صرخة الم فى كل اطباء مصر راعوا الله فى مرضاكم
صرخة الم فى مؤسسين المستشفيات راعوا الله فى ما تصنعوه
صرخة الم فى حكومات مصر اتقوا الله فى اموال الدوله المهدرة
صرخة الم فى كل من غابت ضمائرهم اجعلوا الله فوق كل شىء
صرخة وصرخة وصرخة منبعثة من اعماقى تذكروا ان الدنيا ليست بباقيه لاحد
انا بكدة خلصت كل الى بطلبه منكم انك تتدعوا لاخويا ربنا يشفيه ويرجع يمشى تانى , والواحد بجد اتعلم لو علمتم مافى الغيب لاخترتم
الواقع هو كان نازل عشان رساله الماجستير بتاعته سبحان الله نزل لقدر تانى خالص لكن بجد الحمد لله ويبخته بالحسنات الى
هايخدها واكيد قدر اخف من قدروربنا يجعلها فى ميزان حسناته واسألكم الدعاء واحنا فى ايام جميله من شعبان ....استودعكم الله
